Kwa mujibu wa ripoti ya Idara ya Tarjama ya Shirika la Habari la Hawza, Bodi ya Uongozi ya “Jumuiya ya Wanazuoni wa Kiislamu” wa Lebanon, katika taarifa yake baada ya kikao chake cha kawaida, ilitangaza kuwa msimamo wa serikali ya Lebanon haulingani na ukubwa wa uvamizi wa Israel dhidi ya Dahiyeh Kusini mwa Beirut, uvamizi ambao unahesabiwa kuwa ni shambulio dhidi ya mamlaka na uhuru wa Lebanon, hususan kwa kuwa umetokea katika siku ya Sikukuu ya Uhuru. Aidha, ilielezwa kuwa yaliyotolewa yameishia kuwa ni kauli za kulaani na kukemea tu, bila kuwepo msimamo wa kisiasa wa kiserikali unaolingana na ukubwa wa uvamizi huo.
Jumuiya hiyo iliongeza kuwa; ingefaa kwa serikali ya Lebanon kulitaka Baraza la Usalama la Umoja wa Mataifa kuitisha kikao cha dharura ili kutoa tamko la kulaani uvamizi dhidi ya mji mkuu wa Lebanon, na kuizuia rasmi serikali ya Kizayuni kurudia tena vitendo hivyo. Pia serikali ya Lebanon inapaswa kusitisha hatua zote za upande mmoja kuhusiana na silaha, kama alivyopendekeza Kamanda wa Jeshi la Lebanon, Meja Jenerali Rodolphe Haykal, katika kikao cha mwisho cha Baraza la Mawaziri alichohudhuria.
Jumuiya ya wanazuoni iliendelea kusema: Msimamo kama huo unaweza kumuwekea shinikizo adui wa Kizayuni ili apitie upya mashambulizi yake, hasa atakapojua kuwa suala la kukusanya silaha katika eneo la Kusini mwa Mto (Litani) limesitishwa, ili kwa upande wake naye atekeleze wajibu wake wa kuondoka katika maeneo yanayokaliwa kimabavu, kuwarejesha mateka, na kusitisha uvamizi wa kila siku dhidi ya mamlaka ya Lebanon pamoja na kuhatarisha maisha na mali za raia wa Lebanon.
Taarifa hiyo ya Jumuiya ya wanazuoni, kwa kurejelea uwepo wa Badr Abdel Aati, Waziri wa Mambo ya Nje wa Misri nchini Lebanon, kwa mujibu wa juhudi ya kindugu ya Misri ya kushiriki katika kusitisha uvamizi wa Kizayuni dhidi ya Lebanon, kufanya juhudi za kuondoka kwa Wazayuni katika ardhi zinazokaliwa kwa mabavu, na utekelezaji kamili wa Azimio namba 1701, ilitafsiri hatua hiyo kuwa ni mchango wa kindugu kutoka upande wa Misri. Pia ilieleza matumaini yake kwamba Misri itafanya juhudi za kuiwekea shinikizo Marekani na utawala wa Kizayuni ili adui wa Kizayuni atekeleze wajibu wake katika makubaliano ya kusitisha mapigano na utekelezaji kamili wa Azimio 1701, na sio kwamba uwepo wake uwe tu kwa ajili ya kuiwekea shinikizo Lebanon itoe mapendeleo zaidi; kwa kuwa Lebanon tayari imetoa zaidi ya yale iliyotakiwa, na serikali ya Lebanon imekubali utangulizi wa hati ya Marekani, ilhali adui wa Kizayuni bado hajaonesha kukubali kwake, na anaendelea kukiuka maandiko ya msingi ya Azimio 1701.
Jumuiya ya Wanazuoni wa Kiislamu iliendelea kulaani kuendelea kwa adui wa Kizayuni kukiuka makubaliano ya kusitisha mapigano na Azimio 1701, kupitia kurusha bomu la sauti kutoka katika ndege isiyo na rubani ya Kizayuni juu ya mji wa Maroun al-Ras, pamoja na kuendelea ndege zisizo na rubani za adui wa Kizayuni kuruka katika anga yote ya Lebanon, kama ukiukwaji wa wazi wa mamlaka ya Lebanon, bila kuchukuliwa hatua yoyote na Kamati ya Kusimamia Usitishaji Mapigano.
Jumuiya hiyo iliikaribisha safari ya Waziri wa Mambo ya Nje wa Misri nchini Lebanon katika muktadha wa upatanishi na juhudi za kuondoka kikamilifu kwa adui wa Kizayuni kutoka katika ardhi za Lebanon, utekelezaji kamili wa Azimio 1701 na kulaani ukiukaji wowote usio halali dhidi ya Lebanon. Pia ulimtakia mafanikio katika jukumu lake la kufanikisha yale aliyoyaeleza.
Maoni yako